Yeni nəsil uçan taksilərin ilk sınaqları keçirilib.

Publika.az xəbər verir ki, Zelandiyanın “Kitty Hawk” startapı üzərində 8 il çalışdıqları “Cora” pilotsuz uçan aparatın sınaq uçuşlarını keçirib. Bildirilir ki, nəqliyyat vasitəsinin əsas fərqli xüsusiyyəti vertolyot kimi vertikal qalxa, enə bilməsi və eyni zamanda təyyarə kimi uça bilməsidir. 8 ilə hazırlanan layihənın 6 il sonra satışa çıxarılması planlaşdırılır.

Məlumata görə, yeni nəsil "uçan" taksilərin ekologiyaya da ziyanı olmayacaq. Belə ki, avtonom uçan taksi elektrik mühərriki ilə işləyəcək və ətraf mühit üçün təhlükə törətməyəcək. 2 nəfərlik sərnişinlər üçün nəzərdə tutulan “Cora” 150-900 metr hündürlükdə, saatda 150-180 km sürətlə hərəkət edə bilmək keyfiyyətinə malikdir. Tam enerji topladıqdan sonra uçuş məsafəsi 100 km təşkil edir. Vertikal uçuşu 12 start mühərriki, havada hərəkəti isə 1 əsas mühərrik təmin edir.

Pilotsuz uçan aparat 3 bort kompüteri vasitəsilə naviqasiya hesablamalarını rahatlıqla apara bilir. Onlardan biri sıradan çıxacağı təqdirdə digərləri onun vəzifələrini öz üzərinə götürəcək. Fövqəladə hallar üçün aparatda vintlərin işləməyəcəyi halda belə enməyə imkan verəcək paraşüt nəzərdə tutulub.

“Cora” pilotsuz uçan taksinin nəqliyyat sisteminin tərkib hissəsi olaraq ayrı-ayrı insanlara deyil, şirkət və avtomobil parklarına satılacağı gözlənilir.