Sabahdan etibarən yük avtomobili sürücülərindən tutmuş minik avtomobili idarəedənlərə qədər bir çox sürücünün cərimələnməsinə başlanılacaq.

Axar.az xəbər verir ki, 15 noyabrda yük avtomobillərinin Bakıya giriş qadağasının gücləndirilməsi ilə yanaşı, minik avtomobilinin yan arxa şüşələrində jalüzlərdən istifadəyə verilmiş icazənin müddəti də başa çatır. Bununla da qadağaları pozanlarla bağlı sabahdan müvafiq addım atılacaq.

Sabahdan etibarən Daxili İşlər Nazirliyi şəhərin giriş və çıxışında xüsusi kameralar quraşdıraraq qadağa saatlarında yük avtomobillərin şəhərə daxil olmasına nəzarəti gücləndirməyə start verəcək. Mövcud qaydaları pozan avtomobillər dərhal kameralar tərəfindən qeydiyyata götürüləcək və cərimə olunacaq.

Həmçinin qeyd edilən tarixdən sonra avtomobilin yan arxa şüşələrində jalüzlərdən istifadə edən sürücülərin də cərimələnməsinə başlanılacaq.

Həmin tarixdən sonra jalüzlərin istifadəsinə icazə verilmədiyinə görə hər hansı bir sürücü onları açmayıbsa, İnzibati Xətalar Məcəlləsinin 342.2.4 maddəsinə uyğun olaraq 150 manat miqdarında cərimə olunacaq.

Qeyd edək ki, yan arxa şüşələrə jalüzlərə 1 maydan 15 noyabra qədər icazə verilir.