Zaqatala sakini Azər İmamovun 61 illik retro maşını görənlərin diqqətini çəkir.

Axar.az ARB TV-yə istinadən xəbər verir ki, Azərin retro maşınlara olan marağı və əzmi nəticəsində bu maşın saz vəziyyətə gətirilib. Babasından yadigar qalan maşın tam 3 ilə yığılıb.

O bildirib ki, maşının detalları çətinliklə tapılır:

“Müasir avtomobil deyil ki, mağazadan alasan. Xarici ölkələrdən, Rusiya, Ukraynadan köhnə hissələr gətirirəm. 1958-ci ildən 1970-ci ilədək istehsal edilib. II Dünya Müharibəsi əlilləri üçün nəzərdə tutulub. Köhnə maşınlara marağım var. İstədim ki, babamızın yadigarını qoruyum”.

Avtomobil ancaq əllə idarə olunur. Maşını idarə etmək üçün bütün detallar sükanın ətrafında quraşdırılıb. Maşını görən hər kəs maraqla baxır və foto şəkil çəkdirir.

Sahibinin dediyinə görə, avtomobili almaq üçün 15-16 min AZN təklif edənlər olub. Ancaq o, satmaq istəməyib.