Paytaxtın Həsən Əliyev küçəsində 90 UD 900 dövlət nömrə nişanlı, "Porşe" markalı avtomobilin yolun əks istiqamətində hərəkət edərək piyada keçidində piyadanı vurması hadisəsi ilə bağlı cinayət işi başlanılıb.

Bunu Axar.az-ın sorğusuna cavab olaraq Bakı şəhər Baş Polis İdarəsinin Mətbuat xidmətinin rəhbəri, polis mayoru Elşad Hacıyev deyib. Elşad Hacıyev əlavə edib ki, hazırda bu istiqamətdə istintaq tədbirləri davam etdirilir.

Qeyd edək ki, Avtosfer.az avtomobili sürən şəxsin 16 yaşlı Firuz Salmanov olduğunu yazıb. Firuz Salmanov sosial şəbəkələrdə müxtəlif vaxtlarda "Niva" markalı avtomobil ilə avtoşluq edərək videolar paylaşıb. Eyni zamanda çoxsaylı qayda pozuntuları edib.

Hazırda idarə etdiyi "Porşe" markalı avtomobil anası Ülviyyə Salmanovanın adınadır. Avtomobili isə idarə etmək hüququ atası Pərviz Salmanova məxsusdur. Pərviz Salmanov ticarətlə məşğuldur və parça alğı-satqısı ilə məşğul olur.

Firuz Salmanov sürücülük hüququ olmadan avtomobili idarə edir.

Hadisə avqust ayının 24-də baş verib. Vurulan şəxsin ağır yaralandığı və bir müddət sonra vəfat etdiyi də bildirilir.