Yay aylarında avtomobil bazarında qiymət artımı xarakterikdir.

Bu barədə Axar.az-a Əmlak Ekspert Mərkəzinin direktoru Ramil Osmanlı avtomobil bazarında qiymət artımı barədə danışarkən deyib.

“Qiymət artımı mövcud bazarda qisamüddətli dövrü əhatə etsə də, yay mövsümü üçün xarakterikdir. Son 2 ildə pandemiya ilə əlaqədar ictimai nəqliyyatla bağlı qəbul edilən qərarlar avtomobilə marağı daha da artırdı”, - R.Osmanlı bildirib.

Ekspertin sözlərinə görə, Bakıda avtomobil yükünü azaltmaq üçün bəzi təkliflərin səsləndirilməsi məqbul deyil:

“Yanacaq və dizelin qiymətinin qaldırılması təklifləri, avrostandartların tətbiqi ilə bağlı qəbul edilən müəyyən qərarlar, ortaya çıxan katelizator məsələsi düşünülmüş şəkildə atılan addımlardır. Hesab edirəm ki, bununla avtomobilləşməyə məhdudiyyət yaratmaq olmayacaq. Əksinə, MDB ölkələri ilə müqayisədə bu gün Azərbaycan avtomobilləşmədə çox geridədir. Hesab edirəm ki, ekoloji narahatlığa görə elektromobillərin ölkəyə gətirilməsinə çalışmalı, gömrük idxal siyasətinə dəyişiklik etməliyik. Bakı yollarının avtomobil yükünü isə ictimai nəqliyyatı gücləndirmək, nəqliyyatın intellektual idarəetməsini təmin etməklə azaltmaq mümkündür”.