15:07

Bakı şəhər Dövlət Yol Polisi İdarəsi piyadalara müraciət edib.

Axar.az xəbər verir ki, idarənin rəsmisi polis mayoru Araz Əsgərli açıqlamasında bu gün Heydər Əliyev prospekti şəhər istiqamətində növbəti piyadavurma hadisəsinin məhz yerüstü piyada keçidinin altında qeydə alındığını bildirib.

Onun sözlərinə görə, hadisə zamanı təyin edilməyən yerdən keçən piyada dünyasını dəyişib:

"Bu hadisə ilə bağlı dərin təəssüf hissi ilə bildiririk ki, hələ də öz həyatına, həmçinin ətrafındakı insanların həyat və sağlamlığına son dərəcə məsuliyyətsiz yanaşanlar var. Belə ağır hadisələrin baş verməsi üçün sürücülərdən diqqətli olmaq tələb olunsa da, bəzi piyadaların qaydaları heçə sayması ağır faciələrlə nəticələnir. Vətəndaşlarımızdan xahiş edirik, öz hərəkətlərinə nizamlı və intizamlı formada yanaşsınlar. Sadə qaydaların tələbini ağır sonluqlu facilərə qurban verməsinlər. Yerüstü və yeraltı piyada keçidlərinin olduğu ərazilər kifayət qədər təhlükəlidir. Piyada keçidinin yaxınlığında ondan istifadə etməmək isə təhlükəli olmaqla yanaşı yalnış seçimdir. Yollarda ehtiyatlı olmağı, real təhlükəni bilərək həyatı lüzumsuz bəhanələrə qurban verməməyi bir daha bütün hərəkət iştirakçılarından xahiş edirik”.

Qeyd edək ki, bu gün səhər saat 7 radələrində Elşən Mirzəli oğlu Mehdizadənin idarə etdiyi “Toyota Prius” markalı avtomobil Suraxanı rayonu ərazisində 57 yaşlı Polad Qaçay oğlu Əliyevi vurub. Nəticədə o, hadisə yerində vəfat edib.