Avtobusu idarə edən sürücülərin böyük əksəriyyəti özlərinin cəzasız qalacaqlarını düşünürlər. Onlar davamlı olaraq qaydaları pozur və bu kimi hərəkətlərinə görə məsuliyyət daşımayacaqlarını hesab edirlər.

Bu sözləri Axar.az-a nəqliyyat üzrə ekspert Azər Allahverənov son günlər artan avtobus qəzaları barədə danışarkən deyib.

Onun sözlərinə görə, ictimai nəqliyyatda çalışan insanlar xüsusi təlim keçməlidirlər:

"Ümumiyyətlə, avtobus sürücülərini işə götürərkən onları psixoloji testdən keçirmək mütləqdir, çünki bu, çox ciddi məqamdır. Düşünürəm ki, ictimai nəqliyyat sektorunda güclü nəzarət mexanizmi işə salınmalıdır".

Ekspert artan qəzaların təhlükəli tendensiya aldığını bildirib:

"Mən iş prosesində əfqanlarla çox ünsiyyətdə oluram və onlardan maraqlı bir fakt eşitmişəm. Belə ki, iş dalınca evindən çıxan hər bir əfqan kişisi ailənin bütün üzvləri ilə görüşüb gedir. Ona görə görüşür ki, sağ-salamat evinə qayıdacağına əmin deyil və hansısa silahlının gülləsinə tuş gələ bilər.

İndi ürək ağrısı və təəssüf hissi ilə deyirəm ki, artıq Bakı şəhərində də belə bir vəziyyət yaranıb. Evindən çıxan hər bir şəxs ailə üzvləri görüşüb çıxmalıdır, çünki artıq biz də əmin deyil ki, hansısa naşı və səhlənkar avtobus sürücüsünə tuş gəlməyəcəyik. Yol cəlladları ilə ciddi mübarizə aparılmasa, onlar sonumuza çıxacaqlar".

Qeyd edək ki, son iki gündə avtobus qəzalarında iki nəfər dünyasını dəyişib, iki nəfər isə yaralanıb.