"Avropa oyunlarının keçirilməsinin ölkəmizin tanıdılması və təbliği baxımından əhəmiyyəti böyükdür".

Bu sözləri Axar.az-a açıqlamasında politoloq Vüqar Zifəroğlu deyib. Onun sözlətinə görə, Azərbaycanın qədim və zəngin mədəniyyətini, bəlkə də bundan daha uğurlu şəkildə təbliğ etmək olmazdı:

"Möhtəşəm açılış oldu. Ümumiyyətlə, qədimliyimiz və tariximiz, dəyərlərimizlə bağli kifayət qədər açıq mesajlar verildi. Nizami Gəncəvi, balabanda ifa edilən "Sarı gəlin", Qobustan, xalça miniatürləri, Novruz və Xəzərlə bağlı kompozisiya və ən əsası da məşəli Qarabağ qazisinin gətirməsi böyük anlam ifadə edir".

Vüqar Zifəroğlu idmançılarımıza bu yarışda uğurlar arzulayıb:

"Ümumiyyətlə, oyunların keçirilməsinin ölkəmizin tanıdılması və təbliği baxımından əhəmiyyəti böyükdür. İdmançılarımıza isə dəstək olmalıyıq. Onların uğurlu çıxışları bizim üçün qürurdur. İdmançılarımıza müvəffəqiyyətli və uğurlu çıxışlar arzu edirəm".

V. Zifəroğlu oyunları canlı izləməyin ayrı bir duyğu olduğunu bildirib:

"Dünən güləş oyunlarını canlı izlədim. Boks ve taekvondo yığmamızın oyunlarını da canlı izləmək üçün artıq bilet əldə etmişəm".

Qeyd edək ki, ayın 12-də start götürən yarışlar iyunun 28-ə qədər davam edəcək. Hazırda millimiz 6 qızıl, 2 gümüş, 5 bürünc medalla ilk sırada qərarlaşıb.