Futbol üzrə Braziliyada keçirilən dünya çempionatında qalib gəlmiş Almaniya millisinin qalibiyyətinin sirri açılıb.

Axar.az Türkiyə mətbuatına istinadən xəbər verir ki, səbəb almanların yüksək analız göstəricilərinə malik texnologiyalardan istifadə etmələridir.

Qeyd edək ki, SAP adlı texnologiya saniyədə minlərlə analiz etməklə alman futbolçuların 2010-cu ildəki göstəriciləri ilə müqayisədə nəzərə çarpacaq irəliləyişə nail olduğunu təsdiqləyib. Bir misal: əgər bir futbolçu 2010-cu ildə topu özündə 3,4 saniyə saxlaya bilirdisə, son dünya çempionatında bu göstərici fantastik rəqəmə - 1,1 saniyəyə endirilib. Dünya çempionları məşqlər zamanı SAP vasitəsi ilə dəqiqədə 700 minə yaxın analizli anlar üzərində güclərini toplaya biliblər.

Qeyd edək ki, sözügedən texnologiya sayəsində hücum futbolunu ustalıqla mənimsəyən alman oyunçular birincilik hisslərini yaşayıblar. Almaniya millisinin qalibiyyətinin memarlarından, SAP-ın tətbiqinin əsas ustalarından sayılan Oliver Birhoff bildirib ki, hər oyunçu bir dəqiqə ərzində 700 minə yaxın manevrlə üz-üzədir, seçim imkanı yaranır. SAP texnologiyası müəllifləri Almaniya yığması ilə kifayətlənməyərək, gələcək də digər komandalarla işləyə biləcəklərinə əminlik ifadə ediblər.