Qazaxıstanən Samruk-Kazına Fondu Azərbaycan şirkətləri ilə iki müqavilə imzalayacaq.

Axar.az Teleqraf-a istinadla xəbər verir ki, bu barədə fondun İdarə Heyətinin sədri Nurlan Jakıpov bildirib.

“Samruk-Kazına” Fondu iki sənəd imzalayacaq. Birincisi AZCON holdinqi ilədir. Bu saziş çərçivəsində Orta Dəhlizin (Transxəzər Beynəlxalq Nəqliyyat Marşrutu) daha da inkişaf etdirilməsi, yəni onun potensialının gücləndirilməsi nəzərdə tutulur. Müqaviləyə əsasən, tərəflər Bakı Gəmiqayırma Zavodunda istehsal olunan bərələrin Xəzər dənizində istifadəsi imkanlarını araşdıracaq.

İkinci sazişə əsasən, SK-AIH İnvestisiya Fondu SOCAR ilə birlikdə bərpaolunan enerji mənbələrinin, yəni yaşıl layihələrin maliyyə investoru kimi çıxış edəcək”, - Nurlan Jaqıpov deyib.

Fond rəhbərinin sözlərinə görə, “KazMunayQaz” şirkətinin törəmə müəssisələrindən biri artıq Bakı Gəmiqayırma Zavodundan iki bərə alıb. Bu bərələr 2027-ci ilin sonuna qədər Xəzər dənizində fəaliyyətə başlayacaq.

“Bundan əlavə, Samruk-Kazına AZCON ilə bağlanmış müqavilə çərçivəsində başqa gəmilərin də alınması imkanlarını nəzərdən keçirir. Birinci müqavilənin dəyəri 62 milyon ABŞ dollarıdır”, - Jaqıpov əlavə edib.