Qərb İstanbulun fəthini türklərə bağışlamadı, yüz illər keçsə də, bağışlamayacaq. Türkiyə ilə bu qədər əlləşmələrinin, bölgədə yaşanan bütün hadisələrin əsas səbəblərindən biri məhz budur.

Axar.az xəbər verir ki, bu haqda millət vəkili Qənirə Paşayeva yazıb. Millət vəkili bildirib ki, Qərb istədiyini almaq üçün hər zaman Türkiyə ilə mübarizə aparacaq:

"Qərb İstanbulun fəthini türklərə bağışlamadı, yüz illər keçsə də, bağışlamayacaq. Türkiyə ilə bu qədər əlləşmələrinin, bölgədə yaşanan bütün hadisələrin əsas səbəblərindən biri məhz budur. Bunu hər kəsin bilməsi çox vacibdir. Ancaq İstanbulu türklərdən heç bir zaman ala bilməyəcəklər! Bunu 7 il öncə yaşadığım bir olaydan sonra yazmışdım. Avropalı həmkarlarımla rəsmi yemək zamanı millət vəkillərindən biri "siz Azərbaycanın şəhərləri xaricində hansı şəhəri sevirsiniz" sualına İstanbul deyə cavab verdim. Bu zaman avropalı deputatlardan biri dərhal dedi ki, Kostantinopol möhtəşəmdir. Digərlərinin də söhbəti bu şəkildə davam etdirdirməsini görüb, "ora artıq yüz illərdir İstanbuldur, yoxsa sizə hələ də xəbər gəlməyib", - deyə, zarafatyana gerçəklə söhbəti İstanbula gətirmək istəyirdim ki, avropalı millət vəkillərdindən biri bu dəfə, "Azərbaycan olanda bəzən qarışdırıram, sən də bir türksən və təbii ki, sizin üçün İstanbuldur", - dedi. Mənsə, "təkcə bizim üçün deyil, bütün dünya üçün İstanbuldur, o gözəl şəhərin adı hər zaman İstanbul olaraq da qalacaq", - dedim.

Həmin vaxt yemək masasına dərin bir sükut çökmüşdü. Bu haqda çox konfranslarda bəhs etdim. Gənclərimiz özəlliklə son dönəmlərdə Səlib yürüşlərini çox yaxşı oxumalıdırlar".