ABŞ Prezidenti Donald Tramp İrana zərbə endirmək fikrini dəyişəndə hərbçilər artıq İrana hücum planı hazırlamışdılar və vitse-prezident Vens və dövlət katibi Marko Rubio kimi yüksək vəzifəli şəxslərlə qeyri-rəsmi brifinqlər keçirmişdilər.

Axar.az xəbər verir ki, bu barədə “Voll Strit Jurnal” nəşri məlumat yayıb.

Nəşr iddia edib ki, Trampın çərşənbə axşamı hərbi nazir Pit Heqset və Birləşmiş Qərargah Rəisləri Komitəsinin rəisi general Den Keyn də daxil olmaqla, yüksək vəzifəli şəxslərlə bəzi planları müzakirə etmək üçün görüşməsi planlaşdırılırdı, lakin o, iclasda iştirak etməyib. ABŞ rəsmilərinin bildirdiyinə görə, çərşənbə axşamı Tramp zərbə əmri verməyə meylli olub və Pentaqona İrana zərbəyə hazırlaşmaq tapşırığı verib.

“ABŞ ordusu prezidentin ertəsi gün zərbə üçün son əmri verəcəyini gözləyirdi. Çərşənbə səhəri ABŞ ordusu Amerika hava qüvvələrinin bölgədəki əsas komandanlıq mərkəzi olan Qətərdəki Əl-Udeyd hava bazasından bəzi personalı təxliyə etdi. Lakin Tramp alternativ baxışları dinlədi”, - məlumatda qeyd edilib.

Amerika rəsmilərinin fikrincə, ABŞ sadəcə qısa bir hava hücumu ilə rejimi devirəcəyinə əmin deyildi və İranın hərbi və mülki hədəflərini bombalamağın üsyana kömək edib-etməyəcəyi bilinmirdi.

Prezidentin köməkçiləri bildiriblər ki, ABŞ-ın Amerika qoşunlarını və müttəfiqlərini qoruya biləcək genişmiqyaslı və davamlı hücum aparmaq üçün bölgədə lazımi hərbi aktivləri yoxdur.

İsrail və ərəb ölkələrindəki rəsmilər də Vaşinqtona indi hücum üçün uyğun vaxt olmadığını bildiriblər.

Yaxın Şərq liderlərinin fikrincə, İrandakı vəziyyət çox qeyri-sabit idi və etirazlar artıq əsasən yatırılmışdı. Bundan əlavə, İran hökuməti Amerika hava hücumları nəticəsində çökərdisə, müxalifətə kimin rəhbərlik edəcəyi bəlli deyildi.