Amerikalı maliyyəçi Ceffri Epşteyn ətrafında yaranmış qalmaqal fonunda onun Azərbaycana gəlməsi və guya xarici işlər naziri kimi mənimlə görüşməsi tamamilə absurddur.

Axar.az xəbər verir ki, bu sözləri Teleqraf-a sabiq xarici işlər naziri Elmar Məmmədyarov “Epşteyn işi” ilə bağlı haqqında səslənən iddialara cavab verərkən deyib.

“ABŞ-dan Azərbaycana yüksək səviyyəli məmurlar, Konqres üzvləri gəldikdə mənim vəzifəm ondan ibarət idi ki, onlarla görüşüb, ölkəmizin mövqeyini onlara çatdırım. Bu təbii bir məsələdir. Onlar xahiş edirlər, nazir kimi də mən qəbul edirdim”, - deyə sabiq nazir bildirib.

Elmar Məmmədyarov Epşteynlə görüşmədiyini, onu tanımadığını, Azərbaycana gəlməsindən xəbərsiz olduğunu söyləyib:

“Bu gün öyrəndim ki, belə bir şey olub. Jurnalistlər də soruşdu. Dedim, siz bilirsiniz ki, dəqiq odur? Guya gəlib bulvarda şəkillər paylaşıb, Bakını tərifləyib və s. Amma mənim bunlardan xəbərim olmayıb. Hətta jurnalistlərə dedim ki, bəlkə xəbəri Dövlət Sərhəd Xidmətindən dəqiqləşdirək? Doğrudan da o, bizim sərhədi keçib, ya yox? Çünki nazir kimi mən onu qəbul etməmişəm. Burada səviyyə məsələsi də var axı, Epşteyn kimdir ki, hansısa ölkənin xarici işlər naziri onu qəbul etsin?”