İran regiondakı bütün sülh təşəbbüslərini dəstəkləyir və qonşu ölkələrdə sabitliyi öz təhlükəsizliyinin amili kimi görür, eyni zamanda, vəziyyəti yaxından izləyir.

Axar.az xəbər verir ki, bunu İran-Avrasiya Araşdırmaları İnstitutunun (IRAS) direktor müavini və regional təhlükəsizlik üzrə ekspert Armina Arm bu gün keçirilən “İrəvan Dialoqu-2026” beynəlxalq konfransının kənarında bildirib.

Onun sözlərinə görə, illərdir davam edən münaqişədən sonra Ermənistan və Azərbaycan arasında sülhə doğru irəliləyiş müsbət əlamətdir, Tehran hər iki tərəflə daimi əlaqə saxlayır.

“İran üçün əsas qırmızı xətt Ermənistanla tarixi sərhədin qorunmasıdır - o, dəyişməz və təhlükəsiz qalmalıdır”, - deyə o vurğulayıb.

Ekspert deyib ki, İran ənənəvi olaraq qonşuları ilə münasibətlərə böyük əhəmiyyət verir və Ermənistanı ən yaxın tərəfdaşlarından biri kimi görür:

“İkitərəfli əlaqələr həm hökumət, həm də ictimai səviyyədə sabit qalır və müharibədən sonra belə dəyişməyib. İki dövlət arasında heç bir sistemli problem yoxdur. Sülh prosesinə dəstək praqmatikdir. Lakin mövcud sərhədlərin qorunması Tehran üçün vacibdir”.

İran üçün iki əsas şərt vacibdir: sərhədlərin açıq olması və infrastruktur layihələri də daxil olmaqla, ABŞ və İsrailin İran ərazisi yaxınlığında mövcudluğunun qarşısının alınması”.

Qeyd edək ki, sözügedən tədbirdə Azərbaycan nümayəndəsi də iştirak edir.