Azərbaycan Ermənistan rəhbərliyi qarşısında yeni bir ilkin şərt irəli sürür və söhbət qayıdış hüququ məsələsindən gedir.

Axar.az Globalinfo.az-a istinadən xəbər verir ki, bunu Samvel Karapetyanın rəhbərlik etdiyi Güclü Ermənistan Partiyasının mətbuat katibi Marianna Qəhrəmanyan deyib.

“Qərbi Azərbaycan İcmasının rəhbəri Əziz Ələkbərli bəyan edib ki, qərbi azərbaycanlıların öz tarixi torpaqlarına qayıdışı məsələsi Azərbaycan və Ermənistan arasında sülh prosesi çərçivəsində aparılan müzakirələrin bir hissəsinə çevrilməlidir. Onun sözlərinə görə, bu hüquq bərpa olunmadan regionda möhkəm və dayanıqlı sülhdən danışmaq çətindir. Bu bəyanat Bakının yeni şərt irəli sürdüyünü göstərir. Mövcud hakimiyyət isə erməni xalqı ilə səmimi deyil, real vəziyyəti cəmiyyətdən gizlədir”, – deyə Qəhrəmanyan vurğulayıb.