ABŞ və Rusiya Suriyada ortaq məxrəcə gəlsə də, son atəşkəsi pozan məhz onların müttəfiqləri arasındakı fikir ayrılıqları oldu.

Bu barədə Axar.az-a politoloq İlqar Vəlizadə açıqlama verib. Ekspert bildirib ki, Suriyada vəziyyəti qəlizləşdirən bölgədə maraqlı oyunçuların sayının çoxluğu və onların prosesdə pərakəndə fəaliyyətidir:

"Amerikanın müttəfiqi olan Suriyadakı müxaliflər və onların arxasında duran qüvvələr məqsədlərinə bölgədəki atəşkəslə çata bilməyəcəklərini düşünürdülər. Rusiyanın müttəfiqləri İran və Əsəd də atəşkəsdən narahat idi. Əslində, ABŞ və Rusiya Suriyada ortaq məxrəcə gəlsə də, son atəşkəsi pozan məhz onların müttəfiqləri arasındakı bu fikir ayrılıqları oldu. İran və Əsəd rejimi öz planlarından əl çəkmədi və nəticədə müxalif qüvvələr onlara əks reaksiya verdi. Əsaslı atəşkəsə nail olmaq üçün bütün tərəflər bir araya gəlməlidir. Bunu BMT-dən başqa təmin edəcək ikinci bir struktur yoxdur. BMT rəsmilərinin müharibənin dayanması üçün Hələbdən müxalif qoşunların çıxarılması ilə bağlı fikirləri təklifdən daha çox çıxılmaz vəziyyətdən xəbər verir. Məhz BMT müəyyən təkliflər hazırlayaraq tərəfləri razılığa gəlməyə məcbur edə bilər. Yalnız bundan sonra Suriya böhranında dönüş nöqtəsi başlayacaq və əsaslı atəşkəs təmin olunacaq".