Ermənistan balanslaşdırılmış siyasət yürüdür. Əgər hər hansı geosiyasi güc mərkəzinin təsiri ölkənin müstəqilliyini poza biləcək qədər güclənirsə, İrəvan balansı qorumaq, suverenliyi və müstəqilliyi təmin etmək üçün digər qütblə əlaqələrini gücləndirir.

Axar.az xəbər verir ki, bunu Ermənistan Baş naziri Nikol Paşinyan Bişkekdə keçirilən “ŞƏT plyus” formatında iclasda çıxışı zamanı deyib.

“Ermənistan münaqişə vəziyyətində suverenliyini və müstəqilliyini təmin edə bilməz. İran və Gürcüstanla dostluq münasibətlərimizi inkişaf etdirərək, digər iki qonşumuz – Türkiyə və Azərbaycanla dövlətlərarası münasibətlərin qurulması istiqamətində addımlar atırıq. Bu proses ABŞ Prezidenti Donald Trampın vasitəçiliyi ilə sülh əldə edildikdən sonra daha konkret xarakter alıb.

Hazırda Bakı və Ankara ilə kommunikasiyaların açılması, o cümlədən TRIPP layihəsinin həyata keçirilməsi üzərində işləyirik. Layihənin praktiki icrasına yaxın aylarda başlanacaq.

Bu, təkcə Şərqdən Qərbə – Xəzər dənizindən Aralıq dənizinə qədər deyil, həm də Cənubdan Şimala, Fars körfəzindən Qara dənizə qədər nəqliyyat imkanları yaradacaq. Beləliklə, layihənin həyata keçirilməsindən regionun bütün ölkələri faydalanacaq”, - Paşinyan bildirib.