Azərbaycan Milli Ordusunun zabiti Ramil Səfərovun ekstradisiyasını nəzərdə tutan qətnamə layihəsi AŞ PA-nın 2015-ci ilin yanvar sessiyasında qəbul oluna bilər.

Axar.az xəbər verir ki, bu məlumatı Ermənistan parlamentinin AŞPA-dakı nümayəndə heyətinin üzvü, deputat Naira Zoqrabyan erməni mediasına verib. Onun sözlərinə görə, britaniyalı parlamentari Kristofer Çoupanın təşəbbüsü ilə ərsəyə gələn bu sənədin üzərində Ermənistan nümayəndə heyəti də əlindən gələni edib:

"Əmin olun ki, bu sənəd yekdilliklə dəstəklənəcək. Payız sessiyasına çatdıra bilməsək, növbəti ilin yanvarında qətnamə layihəsi təsdiqini tapacaq. Amma ilin sonuna qədər ilkin müzakirələr aparacağıq".

Erməni deputat həmçinin bildirib ki, mayın 27-də AŞ PA İnsan Haqları Komitəsinin ilk dəfə açıqladığı bu sənəddə Azərbaycanın münasibətlərin indiki gərgin bir dövründə əsirləri bu cür ekstradisiya etməsindən narahatlıq ifadə olunur. Erməni deputat "əmindir" ki, bu narahatlıq ifadə edən qətnamənin AŞPA-da qəbuluna nail ola biləcəklər.