Ağrıda Bələdiyyə sədri seçilən Sırrı Sakık bütün şəhərdən Mustafa Qarabəkir Paşanın adının silinəcəyini deyib.

Türkiyədə keçirilən 30 mart bələdiyyə seçkisi bəzi şəhərlərdə hələ indi dəqiqləşir. Buna səbəb isə məntəqələrdə saxtakarlıq edildiyi iddiaları idi. Bu şəhərlərdən biri də Ağrıdır. Dünən Ağrıda keçirilən bələdiyyə seçkisində milliyətcə kürd olan, Barış və Demokratiya Partiyasının (BDP) namizədi Sırrı Sakık qalib gəlib. O, qalib olduqdan sonra ilk açıqlamasında hər kəsi şoka salacaq ifadələrə yer verib.

Yeni bələdiyyə sədri Ağrının Respublika küçəsində olan pilotlar abidəsini "utanc abidəsi" adlandırıb və götürüləcəyini bildirib. Kürd bələdiyyə sədri bununla kifayətlənməyib, Türkiyə ilə bərabər, Azərbaycanın da tarixində böyük rola sahib Kazım Qarabəkir Paşanın adını bütün küçə, prospektlərdən siləcəyini və heykəllərinin götürüləcəyini qeyd edib.

Xatırladaq ki, Kazım Qarabəkir Paşa (1882-1948) Atatürkün ən yaxın silahdaşı olub. Və Atatürk inqilabına hərbi və siyasi təcrübəsi ilə böyük töhfə verib. Bütün bunlarla bərabər, Kazım Qarabəkir Paşa erməni silahlı qüvvələrinin Naxçıvana təcavüzü zamanı Naxçıvanın müdafiə olunmasında mühüm xidmət göstərib. Qars konfransında (1921) iştirak edib. Naxçıvanın mədəni həyatında yaxından iştirak edən Kazım Karabəkir Paşa şəhərdə teatrın fəaliyyətini bərpa edib, Naxçıvan teatrında türk yazıçılarının dram əsərlərini tamaşaya qoyub, tədris müəssisələri açıb, məktəblər üçün Türkiyədən çoxlu sayda dərsliklər gətirtdirib. Hərbi vətənpərvərlik tərbiyəsinə böyük əhəmiyyət verən və nizami ordu quruculuğunun vacibliyini nəzərə alan Kazım Karabəkir Paşa bu işi öyrənmək üçün bir qrup gənci Türkiyə məktəblərinə oxumağa göndərib /Publika.az/.