Erməni hərbiçiləri Naxçıvan Muxtar Respublikasının (MR) 4 rayonu ərazisindən atəşkəs rejimini pozublar.

Xəbəri Publika.az "Azadlıq" radiosunun Naxçıvandakı müxbiri Məlahət Nəsibovaya istinadən yayıb.

İndiyədək Naxçıvan MR-da atəşkəs rejiminin sabit olduğunu xatırladan M.Nəsibova deyib ki, iyunun 10-dan başlayaraq erməni hərbiçiləri Muxtar Respublikanın Culfa, Ordubad, Sədərək və Şahbuz əraziləri istiqamətindən əhaliyə avtomat və pulemyotlarlarla atəş açmağa başlayıblar:

"Yerli sakinlərdən aldığım məlumata görə, ötən gün Culfanın Ləkədağ ərazisində bir neçə saat atışma olub. Erməni hərbiçiləri bizim tərəfə atəş açıblar. Hətta, 1 nəfər azərbaycanlı, 1 nəfər isə erməni hərbiçinin öldüyü deyilir.

Ötən gün Azərbaycan ordusunun 3 hərbi helikopteri havaya qaldırılıb və səmada dövrə vurub. Hərbi helikopterləri şəhərin özündən də görmək olurdu. Yalnız bundan sonra erməni hərbçilər atəşi dayandırıblar.

Mən bu gün ərzində həmin əraziyə baş çəkəcəm, yerli sakinlərlə də maraqlanacam".

Xatırladaq ki, iyunun 5-də Ermənistan ordusunu Naxçıvan istiqamətində iki əsgərini itirib. Bundan üç gün öncə isə Ermənistan ordusunun atəşkəsi pozması nəticəsində Azərbaycan SQ-nin əsgəri Zaur Həsənli şəhid olub.