Dünən gecə saat 1-də 100-dən çox azərbaycanlı zəvvar Məşhəd və Kərbəla ziyarətinə yollanıb.

Axar.az-ın əməkdaşının verdiyi xəbərə görə, zəvvarlarımız yola düşməzdən əvvəl Bakıda bir sıra müqəddəs yerləri ziyarət edib. Bibiheybət məscidində 8-ci İmam Rza əleyhissаlamın bacısı həzrəti Hökumə xanımın və yeddinci imamın üç nəvəsinin dəfn olunduğu yeri ziyarət ediblər. Şiə etiqadına görə, İslam aləminin mənəvi dəyərlərindən olan bu qəbirlər ziyarət edildikdən və onların ruhuna dua oxunduqdan sonra zəvvarlar avtobuslarla yollarına davam edib.

Zəvvarlar dua etməklə bərabər, Suriyada vəhabi məzhəbindən olan İŞİD üzvlərinin törətdiyi əməlləri lənətləyiblər.

Axar.az-ın əməkdaşına verilən məlumata görə, zəvvarların İranın və İraqın bir sıra şəhərlərindəki pirləri və qəbirləri ziyarət edərək Məşhəd və Kərbəla ziyarətini reallaşdırılması nəzərdə tutulub.

Səfərin 14-16 gün ərzində başa çatması planlaşdırılıb.