"Erməni deputatların Bakıda keçirilən NATO Parlament Assambleyasının seminarına qatılması məqsədli şəkildə olub".

Axar.az xəbər verir ki, bu sözləri Ermənistan Regional Araşdırmalar Mərkəzinin direktoru Riçard Kirakosyan öz mikrobloqunda yazıb. Onun sözlərinə görə, erməni deputatların Bakıya gəlməsi Rusiya XİN rəhbəri Sergey Lavrovun Azərbaycana rəsmi səfəri ilə bağlıdır:

"Erməni deputatlar NATO tədbirinin Rusiya Xarici İşlər naziri Sergey Lavrovun Azərbaycana rəsmi səfəri ilə üst-üstə düşdüyü üçün Bakıya gediblər. Rəsmi Bakı və Moskvanın davranışları Ermənistan üçün bir dərs olmalıdır. Moskva Bakı ilə münasibətləri yaxşılaşdırmaq istəyir. Rusiya yalnız gücə hörmət edir. Ermənistan bundan bir nəticə çıxarmalıdır".

Qeyd edək ki, NATO Parlament Assambleyasının Bakıda keçirilən "Cənubi Qafqaz: Çağırışlar və imkanlar" adlı 86-cı "Rose-Roth" seminarında erməni deputatlar da iştirak ediblər və qalmaqal yaratmaqla yadda qalıblar.