"Dünən Yasamalda avtomobil yolunun qadağan olunmuş hissəsindən keçmək istəyən şəxsin YPX əməkdaşının xəbərdarlığına yumruq zərbəsi ilə cavab verməsinə görə araşdırma başlanılıb".

Axar.az xəbər verir ki, bu sözləri Daxili İşlər Nazirliyinin Mətbuat Xidmətinin rəis müavini Ehsan Zahidov bildirib.

Rəis müavini deyib ki, tədqiqatın nəticəsindən asılı olaraq mətbuata bu haqda geniş məlumat veriləcək.

Xatırladaq ki, dünən saat 18:40-da Yasamal rayonu, Hüseyn Cavid prospektində (Azərbaycan Texniki Universitetinin qarşısındakı magistral yol) YPX əməkdaşları ilə qaydanı pozan piyadalar arasında əlbəyaxa dava olması barədə "Aznevs.az" saytı məlumat yayıb. Avtomobil yolunun qadağan olunmuş hissəsindən keçmək istəyən piyada YPX əməkdaşının xəbərdarlığına yumruq zərbəsi ilə cavab verib. Uzun mübahisədən sonra YPX əməkdaşını yumruqlayan şəxs polis bölməsinə aparılıb.