Türkiyə Prezidenti Rəcəb Tayyib Ərdoğanın rusiyalı həmkarı Vladimir Putinlə görüşünə saatlar qaldı.

Axar.az xəbər verir ki, bu sözləri politoloq Elxan Şahinoğlu qeyd edib. O bildirib ki, Ərdoğan bu görüşdə Qarabağdan da danışmaq istəyir:

“Ancaq qarşı tərəf siyasi dividentlər əldə etmədən Qarabağ münaqişəsinin həllini sürətləndirməyəcək. Putinin Qarabağ münaqişəsinin həlliylə bağlı bəlli şərtləri qüvvədə qalır. Bu, tək onun formalaşdırdığı şərtlər deyil. Bu, Rusya siyasi fikrinin Qarabağ münaqişəsinin həllinə “tarixi baxışıdır”. Yəni “Sən mənim dediklərimin tamamını yerinə yetir, yalnız bundan sonra Qarabağ münaqişəsinin həlini sürətləndirə bilərik”. Nə Gürcüstan, nə Moldova, nə də Ukrayna Rusiyanın eyni ağır şərtlərini yerinə yetirdilər, vassallığı qəbul etmədilər. Ona görə də hər birində Rusiyanın dəstəklədiyi separatçı bölgələr var. Bizdəki kimi”.

Qeyd edək ki, Türkiyə Prezidenti Rəcəb Tayyib Ərdoğan rusiyalı həmkarı ilə görüşmək üçün noyabrın 13-də bu ölkəyə səfər edəcək. Görüşdə Dağlıq Qarabağ münaqişəsinin müzakirə olunacağı da gözlənilir.