Millət vəkili Aydın Mirzəzadə ermənilərin hücumu nəticəsində həlak olmuş 11 əsgərin ailələrinə başsağlığı verib.

Axar.az xəbər verir ki, Feysbuk sosial şəbəkəsinə status yazan millət vəkili xalqın ən dəyərli oğullarını itirdiyini deyib: "Ermənistan-Azərbaycan cəbhə xəttindən gərgin xəbərlər gəlir. Ermənistan diversiya qruplarının bizim mövqeləri ələ keçirmək üçün cəhdlər etdiyi və xırda döyüşlər getdiyi bildirilir. İgid əsgər və zabitlərimiz düşmənin həmlələrinə qəhrəmancasına cavab verir, Azərbaycan torpağını mərdliklə qoruyurlar.

Düşmənin xeyli itki verdiyi xəbərləri yayılır. İşğalçı qüvvələr növbəti dəfə Azərbaycan silahının zəhmini və gücünü öz üzərilərində hiss edirlər.

Qarşıdurmada Azərbaycan əsgər və hərbi qulluqçularının da şəhid olduğu bildirilir. Şəhidlər öz həyatları hesabına torpağı qoruyurlar. Xalqımız ən dəyərli oğullarını itirir. Allah onlara rəhmət eləsin.

Bu situasiyada qəlbən və düşüncəmizlə həlak olmuş əsgərlərin ailələrinin, qəhrəman əsgər və zabitlərimizin yanındayıq. Onlara güc və Allahdan hifz olunmalarını arzu edirik".

Millət vəkili Qənirə Paşayeva da sosial şəbəkələrdə şəhid olan əsgərlərimizlə bağlı belə bir status yazıb: "Yayın ortasında bu qəribə yağışa bax. Göylər də şəhidlərimiz üçün ağlayır".