Son günlər Qarabağ bölgəsində Ermənistanın işğalçı ordusunun atəşkəsi intensiv pozması, təxribat xarakterli əməliyyatlara əl atması nəticəsində hər iki tərəfin çoxsaylı itki verməsi müharibənin artıq başlaması təsəvvürünü yaradıb. Vəziyyəti qəzetimizə şərh edən Qarabağ qaziləri artıq geri yol olmadığı və müharibəni başlatmağın zamanının çatdığı fikrindədirlər.

Qarabağ qazisi Rey Kərimoğlu "Musavat.com"a bildirib ki, baş verənlər artıq müharibədir:

"Düşünürəm ki, bu, bir məqamıdır və artıq müharibədir. Dünya gördü ki, ermənilər bizim səngərlərə basqın ediblər, itkilərimiz var. Düşünürəm ki, ordu hərəkətə keçməli və bu məsələni birdəfəlik bitirməliyik. Geri çəkilmək olmaz. Mən buradan çağırış edirəm ki, ön cəbhəyə keçmiş döyüşçüləri çağırsınlar. Bizim 1991-1994-cü illərdə əməliyyatlarda iştirak etmiş əsgər və zabitlərimiz var. Müdafiə Nazirliyinin rəhbərliyi müəyyənləşdirməli və hər səngərə keçmiş döyüşçülərdən bir-iki nəfəri yerləşdirməlidir. Gənc əsgərlərimiz onların təcrübəsindən faydalanmalıdır. Biz 18-20 yaşlı əsgərlərimizi ermənilərə yem edə bilmərik. Mən ordu rəhbərliyindən xahiş edirəm ki, keçmiş döyüşçüləri orduya cəlb etsin. Çünki onların təcrübəsi var. Hətta elə qazi döyüşçülərimiz var ki, onlar ordunun psixoloji hazırlığına kömək edə bilər. Bizim torpaqlarımız işğal altındadır və biz psixoloji cəhətdən yaxşı deyilik. Amma Qarabağ müharibəsində kifayət qədər uğurlu əməliyyatlar olub. Ağdərə, Horadiz əməliyyatı, Tərtərin Həsənqala istiqamətindəki müdafiə əməliyyatları, Ağdamın 43 kəndinin müdafiə olunması əməliyyatları və başqa uğurlu əməliyyatlar olub. Bu əməliyyatlarda iştirak etmiş kifayət qədər əsgər və zabit heyətimiz var. Bunlar ön cəbhədə dayanmalıdır".

R.Kərmoğlu müharibə ərəfəsi olduğu üçün itkilərin olmasının gözlənilən hal olduğunu da deyib:

"Əvvəlki illərə baxanda bir neçə gündə verdiyimiz itkilər çoxdur. Ancaq artıq müharibə gedir və itkilərin olması gözləniləndir. O vaxtlar biz bir gündə 100-200 şəhid verirdik. Yəni müharibədə hər şey olur. Mən tam məsuliyyətimlə deyirəm ki, erməni tərəfinin itkisi bizdən ən azı iki dəfə çoxdur. Düzdür, rabitə texnologiyalarının, müasir texnikanın, internet mediasının inkişafı gedən bir zamanda ölüm və itkiləri gizlətmək çətindir. Xüsusən də Azərbaycan tərəfindən. Azərbaycan bir itkisini də gizlədə bilmir. Çünki tutaq ki, Lerikdə, Yardımlıda bir nəfər əsgər şəhid oldusa o dəqiqə hamı bunu bilir. İnternetdə, sosial şəbəkələrdə bu haqda hay düşür. Amma Dağlıq Qarabağda dünyanın nəzarət edə bilmədiyi bir ərazi var. Ermənistanda həlak olan əsgərlərin heç valideynlərinə xəbər verilmir, onlar elə Dağlıq Qarabağda dəfn edilir. Üstündən bir neçə gün keçdikdən sonra onları müxtəlif adlarla Ermənistana aparıb dəfn edirlər. Yəni Ermənilərin itkilərini gizlətmək üçün kifayət qədər imkanları var. Biz orduda olmasaq da məlumatımız var ki, erməniyə layiqli cavab verilib. Ermənilər ilk gün çox çaşqın vəziyyətdə idilər. Bunun ardınca dərhal hücuma keçmək lazım idi. Ancaq biz gecikirik. Dərhal hücum olsaydı, ən azı bir rayonumuzu tam qaytarmaq imkanımız vardı. Mən istəyirəm ki, torpaqlarımızı azad edənədək geri çəkilməyək. Ancaq heç nə bizim istəyimizlə olmur. Ordunun rəhbərliyi, bizim ali baş komandanımız var. Həmçinin bizim artıq nəzarətimizdən çıxan, təsir imkanlarımızdan kənarda olan ATƏT-in Minsk Qrupu və digər böyük güclü dövlətlər var. Bunlar münaqişənin həllində iştirak edirlər. Görünür, onların da basqısı, təzyiqi var. Ona görə ola bilər ki, yenidən atəşkəs elan olunsun. Ancaq mən düşünürəm ki, artıq bunu keçmək lazım deyil".

"Qarabağ qaziləri" Birliyinin sədri Etimad Əsədov isə baş verənlərin nə müharibə, nə də atəşkəs olduğunu bildirib:

"Çox təəssüf olsun ki, biz şəhidlər veririk. Bu çox üzücü haldır. Allah onlara rəhmət eləsin. Son olaylar ondan xəbər verir ki, ermənilər öz xəbis, separatçı niyyətindən əl çəkmək, torpaqlardan çıxmaq fikrində deyillər. Azərbaycan dövləti və xalqı öz torpağına sahib çıxmalıdır. Xalq Azərbaycan dövlətinin rəhbərinin arxasında birləşməlidir. Bu gün Azərbaycanda vətənpərvərlik ruhu çox yüksəkdir. Azərbaycan artıq müharibə elan etməli və xalqı ordu ilə birlikdə müharibəyə cəlb etməlidir.

Torpaqlarımızı geri almalı və ermənilərdən təmizləməliyik. Müharibə varsa, şəhidlərimiz də olacaq. Bu bizə çox ağırdır. Ancaq düşmənlərində itki verdiyini görüb az da olsa təsəlli tapırıq. Azərbaycan övladları vətəni müdafiə etmək üçün doğulub. Şəxsən mən özüm əlil olaraq müharibənin başlamasını bütün gücümlə istəyirəm.

Müharibənin başlamasını gözləyirəm ki, özüm də gedim o əsgərlərə qoşulub qalib bir dövlətin, qalib bir ordunun əsgəri olum. Qalib bir xalq olaraq qələbə zəfəri yaşamaq istəyirəm. İstəyirəm ki, mən də vətənə olan sevgimi ortaya qoyum. Bəlkə şəhid olacağam, amma ən azından bilim ki, torpaqlarımız azad oldu və Azərbaycan dövləti qalib bir dövlət oldu".