"Oğlumun qisası üçün həyatda olan 2 oğlum, qardaşım uşaqları, kəndin cavanları bu dəqiqə Ali Baş komandanın döyüş əmrini gözləyirik".

Bu sözləri şəhid gizirimiz Qaryağdı Əhmədovun yas mərasimində iştirak edən əməkdaşımıza mərhum gizirin atası Eldar Əhmədov deyib. O, bildirib ki, oğlu Qaryağdı həqiqi hərbi xidmətini başa vurduqdan sonra könüllü olaraq bu yolu seçib. Şəhidin atası oğlunun vətən yolunda canından keçməklə bağlı valideynləri ilə bir neçə gün öncə söhbət etdiyini deyib:

"Elə bu qapıdan çıxarkən bizə dedi ki, Siz oğlunuzun döyüş bölgəsində olması ilə fəxr edin. Şəhid olsam da, üzülməyin. Şəhid olmaq fəxrdir". Şəhidin atası bir sıra xəbər saytlarına da iradını bildirdi: "Ay oğul, siz Allah, dediklərimi yazın. Əziyyət çəkib gəlmisiniz, çox sağ olun. Pis başa düşməyin, ancaq bəziləri Bakıdan zəng edib danışırlar və yazını yazan zaman demədiklərimi yazırlar".

Qeyd edək ki, şəhid Qaryağdı Əhmədov ölümündən sonra, avqustun 3-də "Hərbi xidmətdə fərqlənməyə görə" III dərəcəli medalı ilə təltif edilib və medal şəhidin atası Eldar Əhmədova verilib.

Xatırladaq ki, gizir Qaryağdı Əhmədov öz doğum günündə, yəni avqustun birində düşmənin snayperindən açılan atəş nəticəsində şəhid olub. Qaryağdının cənazəsi qardaşı tərəfindən kənd camaatının iştirakı ilə Ağdam şəhər məscidində yuyulub və torpağa tapşırılıb.