Niderland Krallığının Assen şəhərində fəaliyyət göstərən "Odlar Yurdu" Cəmiyyəti Avropa Ombudsmanına və Avropa Parlamentinə məktubla müraciət edib.

Axar.az xəbər verir ki, məktubda Ermənistan silahlı qüvvələri tərəfindən atəşkəsin pozulması nəticəsində 13 hərbçimizin şəhid olmasına etiraz bildirilib və işğalçı Ermənistanın diversiya əməliyyatlarına biganə qalmamağa çağırış edilib.

Çağırışda qeyd edilir ki, dünya ictimaiyyəti nəhayət ki, Ermənistanın son addımlarının bölgədə sülh və əminamanlıq üçün nə qədər təhlükəli olduğunu anlamalı və ədalətli mövqe nümayiş etdirərək, Ermənistanın 1994-cü ildə imzalanmış atəşkəs müqaviləsinin müddəalarını kobud şəkildə pozması və Azərbaycana qarşı təxribatlarını ciddi şəkildə pisləməlidir.

Sonda bir milyona yaxın Azərbaycan vətəndaşının hələ də qaçqın və məcburi köçkün həyatı yaşadığı xatırladılır, Avropa Ombudsmanı və Parlamentindən təcavüzkarlıq siyasətinin qarşısının alınması üçün Ermənistan dövlətinə qarşı təzyiqlərin gücləndirilməsi xahiş edilir.