Prezident Serj Sərkisyandan fərqli olaraq, son günlər fəallığı ilə seçilən Ermənistan Baş naziri Ovik Abramyan erməni jurnalistlərinin təmas xəttində baş verən hadisələrlə bağlı suallarını cavablandırmalı olub.

Axar.az-ın Ermənistan mediasına istinadən xəbərinə görə, hökumət başçısının ölkənin Xarici İşlər Nazirliyinin fəaliyyəti ilə bağlı açıqlaması yerli kütləvi informasiya vasitələrində gülüşlə qarşılanıb.

Qeyd edək ki, öncə sülhün əldə olunmasının vacibliyini vurğulayan Abramyan müharibənin heç bir fayda verməyəcəyini, bundan həm Ermənistanın, həm də Azərbaycanın zərər çəkəcəyini dilə gətirib.

Ən diqqət çəkən məqam və erməni mediasının etirazına səbəb olan hissə isə Ermənistan Baş nazirinin jurnalistlərin son günlər, başda nazir Edvard Nalbandyan olmaqla, Xarici İşlər Nazirliyinin fəallığının görünməməsi ilə bağlı suallarını cavablandırmasıdır:

"Necə yəni, Xarici İşlər Nazirliyi işləmir, fəal deyil? XİN nə etməlidir? Açığını desəm, bəzi prosesləri diqqətimdən qaçırmışam. Daha yaxşı olardı ki, onların informasiya şöbəsinə zəng edərdiniz və suallarınıza geniş aydınlıq gətirərdilər. Nə işlə məşğul olmalarından isə xəbərim yoxdur".