Diaspor Jurnalistləri Birliyinin təşkilatçılığı ilə bir neçə diaspor üzvü son günlər cəbhə xəttində döyüşlərdə dünyasını dəyişən 3 şəhidin ailəsinə baş çəkiblər.

Axar.az xəbər verir ki, bu barədə informasiya Diaspor Jurnalistlər Birliyi yayıb.

Təşkilat üzvləri daha sonra Biləsuvar rayonunda dəfn edilən şəhidlərin məzarlarını ziyarət edib. Görüşdə Diaspor Jurnalistləri Birliyinin İdarə heyətinin üzvləri, Diasporla İş üzrə Dövlət Komitəsinin əməkdaşı Əbülfəz Şeydabəyov, Niderland-Azərbaycan Evinin sədri Elxan Mirhəşimli, məşhur rusiyalı araşdırmaçı yazar Aleksandr Fomenkov, Ümumrusiya Azərbaycan Konqresinin təmsilçisi, diaspor jurnalisti İlahə Ələkbərova iştirak ediblər. Qonaqları qəbul edən Biləsuvar Rayon İcra Hakimiyyəti başçısının birinci müavini Xanlar Məmmədov bu təşəbbüsü yüksək qiymətləndirərək qonaqlara öz təşəkkürünü bildirib.

Xatırladaq ki, cəbhə xəttindəki son hadisələr zamanı şəhid olanlardan üçü - 37 yaşlı gizir Pərvin Əliyev, 28 yaşlı kiçik gizir Rahil Hüseynov, 1996-cı il təvəllüdlü əsgər Anar Qafarzadə Biləsuvar rayonundandırlar. Hər üç şəhid doğulduqları Nərimankənd kəndinin qəbiristanlığında dəfn ediliblər.