Bu gün Azərbaycanın aparıcı xəbər saytlarından olan "Qafqazinfo"nun fəaliyyətə başlamasından 4 il ötür.

Saytın əməkdaşları Axar.az-a verdikləri açıqlamada 4 il ərzində qazandığı uğurlar və gələcək planlar barədə fikirlərini bölüşdülər.

Baş direktor Elbrus Ərud 4 il ərzində çox sınaqlardan keçdiklərini, amma hamısından üzü ağ, alnıaçıq çıxdıqlarını bildirdi. "Qafqazinfo"nun Azərbaycanda azad medianın göstəricilərindən biri olduğunu deyən baş direktor xəbər saytlarının daha da çox olmasını arzuladığını, bununla da rəqabət şəraitində fəaliyyət göstərmək istədiklərini dedi:

"Saytımız nəinki Azərbaycan, eləcə də Qafqazda özünəməxsus yeri və reytinqi olan saytlardandır. Bütün gecə-gündüzümüzü ancaq saytın inkişaf etməsinə, cəmiyyətə balanslı xəbər çatdırmağa həsr edirik".

Redaktor Elnur Məmmədli bildirdi ki, bu illər ərzində kifayət qədər fəal və peşəkar bir yol keçiblər. Bu yolda çoxsaylı çətinliklərlə qarşılaşdıqlarını, lakin başladıqları yolu davam etdirməkdə israrlı olduqlarını deyən redaktor əlavə etdi ki, əsas uğurlardan biri də neytral mövqeyi qoruyub saxlamaqdır.

Saytın xəbər direktoru Günel Əbilova da saytla bağlı təəssüratlarını bizimlə bölüşdü:

"Bura mənə ailəm qədər, bəlkə də ailəmdən də yaxındır. Ən böyük məqsədim saytın inkişaf etdirilməsinə və reytinqinin artmasına xidmət etməkdir. Ən böyük uğurlarımızdan biri də kollektivin öz işinə ürəkdən bağlı olmasıdır".

Axar.az olaraq həmkarlarımızı təbrik edir, daha böyük uğur və sağlam rəqabət arzulayırıq.