"Ermənistan tərəfi bir daha ucuz şou düzəldir. Onlar hesab edirlər ki, bununla Litva ictimaiyyətini aldatmağa nail ola biləcəklər. Amma hər dəfə ermənilərin atdığı addımlar əks-reaksiya verir".

Bu sözləri Axar.az-a Azərbaycanın Litvadakı fövqəladə və səlahiyyətli səfiri Həsən Məmmədzadə litvalı deputat Dalya Kuoditenin Dağlıq Qarabağa səfərinə münasibət bildirərkən deyib.

Səfir qeyd edib ki, deputatın separatçı rejim üzvləri ilə görüşməsi, ümumilikdə bu hadisə Litva Xarici İşlər Nazirliyi və Seym (parlament) rəhbərlərinin qəzəbinə səbəb olub:

"Onlar istəməyərək Litva ictimaiyyətinin diqqətini yenidən Azərbaycanın işğal olunmuş ərazilərinə yönəldiblər. Artıq iki gündür ki, Litva telekanallarında, mətbuatında ölkəmizi müdafiə edən reportajlar, məqalələr efirə verilir".

Qeyd edək ki, litvalı deputat sentyabrın 1-də Azərbaycan XİN-in rəsmi razılığı olmadan işğal altındakı torpaqlarımıza - Dağlıq Qarabağa səfər edib.