"Ukrayna məsələsində Putin rahatlıqla geri addım atmayacaq".

Bu sözləri Axar.az-a açıqlamasında politoloq Fərhad Mehdiyev son günlər Rusiyanın Ukraynaya güclü təzyiq göstərməsini şərh edərkən deyib.O bildirib ki, Rusiya Ukraynaya heç vaxt rəsmi müharibə elan etməyəcək:

"Rusiyanın Ukraynaya hər keçən gün daha da güclü təzyiq göstərməsini əslində Moskvanın Kiyevə elan olunmamış müharibəsi hesab etmək olar. Rusiya bu yolda separatçıları dəstəkləməyə davam edəcək. Qərb sanksiyaları nə qədər sərtləşdirəcəksə, Rusiya da separatçılara dəstəyi bir o qədər artıracaq. Vladimir Putin bu məsələdə çox qərarlıdır. Əgər o, bu qədər ciddi olmasaydı, heç öncədən münaqişəyə başlamazdı. Ona görə də Putin rahatlıqla geri addım atan deyil. Əslində, müharibə elə bu şəkildə də davam edəcək. Buna görə də Rusiya qısa müddətdə Ukrayna məsələsini həll edə bilməyəcək".