"Qəbələ"nin baş məşqçisi Sənan Qurbanov Avropa Liqasının I təsnifat mərhələsində qarşılaşacaqları Lüksemburqun "Proqres" komandası barədə fikirlərini bölüşüb.

Report-un məlumatına görə, 38 yaşlı mütəxəssis klubun rəsmi saytına açıqlamasında "Proqres"in kifayət qədər ciddi rəqib olduğunu bildirib. O, şansları bərabər qiymətləndirib: "“Püşkatmadan öncə 5 mümkün rəqibimiz var idi. Bunlar təxminən eyni səviyyəli, oxşar komandalar idi. Püşkün nəticəsinə görə “Proqres”lə qarşılaşacağıq. Ötən mövsüm Şotlandiyanın “Reyncers” klubunu mübarizədən kənarlaşdırmış Lüksemburq təmsilçisi kifayət qədər ciddi rəqibdir. Ümumilikdə hazırki durumda şanslar bərabərdir".

S.Qurbanov planlarını rəqibə görə quracaqlarını əlavə edib: "Proqres" barədə gündəlik məlumatlar toplanacaq. Bizim üçün Cavid Hüseynovun yoxluğu ciddi itkidir. Bəzi mövqelərdə boşluqlarımız var. Bu boşluğu yeni futbolçu və ya futbolçularla doldurmağa çalışacağıq. “Proqres”lə matçadək vaxtımız azdır. Hər gün, hər məşq vacibdir. İlk oyunun evdə və ya səfərdə keçirilməsi üstünlük deyil. Birinci növbədə komandanın hazır olmasıdır. Bu təlim-məşq toplanışında yaxşı oyun formasını yığmalıyıq”.

Qeyd edək ki, "Qəbələ" "Proqres"lə ilk oyununu iyulun 12-də səfərdə. cavab görüşünü iyulun 19-da öz meydanında keçirəcək.