"Xəstə təxəyyüllü bir dövlət başçısının NATO kimi bir təşkilatın tribunasına çıxaraq, təhlükəsizlik və sülhdən danışması böyük paradoksdur".

Bu sözləri Axar.az-a açıqlamasında Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev Ermənistan Prezidenti Serj Sərkisyanın NATO-nun sammitinə qatılmasını şərh edərkən deyib:

"NATO Dağlıq Qarabağ münaqişəsinə dəfələrlə münasibət bildirsə də, Azərbaycanın ərazi bütövlüyünün bərpası ilə bağlı hələ də konkret bir mövqe ortaya qoymayıb. Başqa bir məqam - təəssüflər olsun ki, dünən ABŞ Dövlət katibi Con Kerrinin iştirakı ilə keçirilən görüşdə ATƏT-in Minsk Qrupu üzv ölkələri Ermənistana nəinki sanksiyalar tətbiq etməkdən danışıb, hətta bu haqda öz laqeyd mövqelərini ortaya qoydular. Hesab edirəm ki, bu gün işğal olunmuş ərazilərin boşaldılmamasına, təmas xəttində erməni təxribatlarına və bunun nəticəsində çoxlu sayda itkilər verməyimizə diqqətin yetirilməməsi beynəlxalq təşkilatların, həmsədr ölkələrin bizə qarşı böyük hörmətsizliyinin göstəricisidir. İşğalçı Ermənistan mütləq cəzalandırılmalıydı. Ermənistan kimi işğalçı bir dövlətin NATO-nun sammitinə buraxılmasını kökündən yanlış hesab edirəm. Xəstə təxəyyüllü prezidentin NATO kimi bir təşkilatın ali tribunasından təhlükəsizlik və sülhdən danışması paradoksdur. "Xocalı" faciəsi boyda bir soyqırımı həyata keçirən şəxslərdən birinə sammitdə söz verilməsi NATO-nun imicinə böyük zərbədir".

Xatırladaq ki, NATO-nun Uels sammiti bu gün başa çatır.