Ərdoğanın qələbəsi Türkiyənin gələcək inkişafı və sabitliyi baxımından çox mühüm bir hadisədir.

Axar.az xəbər verir ki, bunu millət vəkili Hikmət Babaoğlu Türkiyədə 24 iyun seçkilərinin nəticəsini şərh edərkən deyib.

Deputat bildirib ki, Türkiyənin qədəm qoyduğu yeni mərhələ qardaş ölkənin gələcək yerinin müəyyənləşməsi baxımından da önəmli rol oynayacaq:

“Türkiyənin yerləşdiyi geostrateji bölgə də daxil olmaqla bütövlükdə Yaxın Şərq və Şimali Afrika təhlükəsizlik baxımından ən çox təhdidlərə məruz qalan bir siyasi coğrafiyadır. Bu təhdidlərin mənbəyi olan bir sıra imperialist mərkəzlər həmin coğrafiya üzərində hibrid müharibələr vasitəsilə öz maraqlarına xidmət edəcək yeni nizam yaradırlar. Belə kritik mərhələdə Türkiyənin regionun ən güclü aktyoru kimi sərgilədiyi davranışlar həm qardaş ölkənin, həm də bütövlükdə regionun siyasi gələcəyi üçün olduqca vacib idi. Ya Türkiyə xalqı doğru qərar qəbul edərək dövlətçilik və regionda söz sahibi ola bilmə problemini həll edəcək, ya da müsəlman şərqinin digər dövlətlərinin taleyini yaşamağa məhkum ediləcəkdi. Düşünürəm ki, Türkiyə xalqı bu siyasi reallığı obyektiv qiymətləndirməyi bacarmaqla ən doğru qərarı qəbul etdi. Cümhur İttifaqının qələbəsi Türkiyənin gələcək inkişafı və sabitliyi baxımından çox mühüm bir hadisədir”.

Qeyd edək ki, ötən gün Türkiyədə prezident və parlament seçkiləri baş tutub. Prezident seçkisində Rəcəb Tayyib Ərdoğan 52,5% səslə qalib gəlib.