"Kerrinin Əliyev və Sərkisyanla görüşməsi ABŞ-ın Rusiyanın üzərinə həmlə etməsidir".

Bu sözləri Axar.az-a politoloq Ərəstun Oruclu ABŞ Dövlət katibi Con Kerrinin Azərbaycan və Ermənistan rəhbərlərinin "böyük sülh sazişi" imzalaması üçün daha təkidlə fəaliyyət göstərməli olması məsləsini şərh edərkən deyib. O, ABŞ-ın Rusiyanın imperiya ideyalarından əl çəkməsi üçün hərəkətə keçdiyini bildirib:

"Rusiya dondurulmuş münaqişələri nəzarətdə saxlamaqla faktiki olaraq bölgədə iki 20 il dominantlıq eləməyə müvəffəq oldu. Bundan sonra Rusiyanın hərbi baxımdan güclənməsi və yaratdığı qurumlara postsovet ölkələrini cəlb etməyə çalışmasından biz gördük ki, burada zorakılıq amili müstəsna rol oynayır. ABŞ anladı ki, Moskva artıq yeni imperiya iddiasına düşüb və onu bundan çəkindirməkdən ötrü bütün münaqişələri eyni vaxtda həll etmək lazımdır. Çünki Rusiyanın artıq Ukrayna prosesinə cəlb olunması onun gücünü zəiflətdi. Yaranmış şəraitdə ABŞ artıq cəbhə xəttini genişləndirmək qərarına gəldi. Bu dolayı olaraq müxtəlif məsələlərdə özünü göstərdi".

Politoloq Rusiyaya qarşı cəbhənin daha da genişlənəcəyini söyləyib:

"NATO sammiti faktiki olaraq Rusiyanın əleyhinə idi. Biz gördük ki, həmin sammitdən sonra ABŞ Müdafiə naziri Çak Hegel dərhal Gürcüstana səfər etdi. Burada yenə də Gürcüstanın dəstəklənməsi və Rusiyanın ağalıq etdiyi iki separatçı bölgədən qoşunlarının çıxarılması məsələsi səsləndirildi. Digər tərəfdən, Kerrinin Azərbaycan və Ermənistan prezidentləri ilə görüşü, Ukraynaya ifadə olunan dəstək onu göstərir ki, Rusiyayla başlanmış geosiyasi qarşıdurma daha geniş müstəviyə keçəcək. Bu baxımdan da Dağlıq Qarabağ münaqişəsinin həlli məsələsi zəruri elementlərdən biri olur. Əslində, ABŞ hər iki tərəfə təklif edir ki, kompromis sülhə hazır olsunlar. Əgər diqqət etdinizsə, orada belə bir fikir səsləndi ki, xalqlar kompromisə hazır olmalıdır. Bu kompromisin nədən ibarət olduğunu söyləmək çətindir. Çünki bilirsiniz ki, belə şeylər ancaq qapalı görüşlərdə bəlli olur. Amma hər halda ümumi konturlar bəllidir. Konturlar ondan ibarətdir ki, ABŞ təşəbbüs göstərir və bu əslində yenilikdir".