Azərbaycan NATO-nun antiterror koaliyasının mühüm üzvüdür, buna görə də alyans ölkəmizə açıq dəstəyini ifadə edir.

Bu sözləri Axar.az-a Prezident İlham Əliyevin Brüsselə səfəri haqda danışan millət vəkili Asim Mollazadə deyib. Deputat bildirib ki, Avropa Birliyi ilə tərəfdaşlıq Azərbaycan üçün mühüm əhəmiyyət kəsb edir:

“Avropa Birliyi ilə Azərbaycan arasında tərəfdaşlıq haqqında çox mühüm sənəd imzalandı. Bu, Azərbaycanla AB və Qərb arasında münasibətlərin bütün sahələrdə dərinləşməsinə xidmət edir. Azərbaycanla Avropa Birliyi arasında paraflanmış “Tərəfdaşlıq prioritetləri” sənədi ikitərəfli tərəfdaşlıq əlaqələrinin gələcək inkişafı üçün yeni imkanlar açır. Avropa Birliyi Azərbaycanın ticari dövriyyəsində ən əsas tərəfdaşdır. Bu əməkdaşlıq gələcəkdə imzalanacaq sazişlərdə də mühüm rol oynayacaq. Bu fonda Azərbaycanla AB arasında əlaqələr daha da güclənəcək. Avropa İttifaqı ölkələrin ərazi bütövlüyü və dövlətlərin beynəlxalq sərhədlərinin toxunulmazlığı prinsipini dəstəkləyir. Sərhədlərin toxunulmazlığı məsələsi ilk dəfə belə xüsusi qeyd edildi. Ölkəmizin “qoşulmama” qərarı tərəfdaşlıq əsasında siyasətin qurulmasına xidmət edir. Buna görə də inanıram ki, qarşılıqlı maraqlar əsasında bölgədə sabitlik və inkişaf hökm sürəcək”.