Bilik Fondunun Bilik Günü münasibətilə tanınmış alimlərin bölgələrdə mühazirələr deməsi təşəbbüsünə tanınmış ictimai xadim, Dövlət müşaviri, akademik Kamal Abdulla da qatılıb.

Fondun informasiya təminatı sektorundan Axar.az-a bildiriblər ki, akademik Kamal Abdulla "İlboyu bilik" proqramı çərçivəsində Şamaxı rayonunun Sabir qəsəbəsindəki orta məktəbdə ikinci dərsi aparıb.

Tədbirdə rayon icra başçısı başçısı Asif Ağayev, müavinlər Qasım Qasımov, Gülnisə Ələkbərova, təhsil şöbəsinin müdiri Eyvaz Eminalıyev, Yeni Azərbaycan Partiyası Şamaxı rayon təşkilatının sədri Bəxtiyar Abbasov, rayon ziyalıları, müəllim və şagirdlər iştirak ediblər.

Kamal Abdulla mühazirədə Azərbaycanın bugünkü tərəqqi yolundan danışıb, ümummilli lider Heydər Əliyevin ideyalarını uğurla həyata keçirən Prezident İlham Əliyevin gənc nəslin hərtərəfli inkişafına göstərdiyi qayğıdan söz açıb.

Sonda məktəblilərin suallarını cavablandıran K.Abdulla onlara maraqlı kitablar hədiyyə edib.