"Bir etibarlı tərəfdaş və qonşu ölkə kimi regionda həyata keçirilən transmilli layihələrin uğurla reallaşması üçün Gürcüstan əlindən gələni edəcək".

Axar.az Gürcüstan hökumət başçısının rəsmi Feysbuk səhifəsinə istinadən xəbər verir ki, bu sözləri gürcü Baş naziri İrakl Qaribaşvili Bakıda "Əsrin Müqaviləsi"nin 20 illiyinə həsr olunmuş tədbirdə çıxışında deyib.

O bildirib ki, əldə olunan nailiyyətlərdən yararlanmaqla gələcəkdə regionda reallaşacaq digər layihələri də uğurla həyata keçirmək və genişləndirmək olar:

"Bu məsələlərdə Gürcüstan üzərinə düşən bütün öhdəlikləri yerinə yetirməyə hazırdır".

Gürcüstan Baş naziri daha sonra regionda neft-qaz, eləcə də digər layihələrin reallaşmasında Azərbaycanın əvəzsiz rola malik olduğunu bəyan edib. O, Avropanın, eləcə də bölgənin enerji təhlükəsizliyinin təminatı məsələsində Azərbaycan, Gürcüstan və Türkiyənin birgə səylərini yüksək qiymətləndirib. Qaribaşvili ölkəsinin Qazaxıstan və Türkmənistanın təbii ehtiyatlarının ixracı üçün Tranxsəzər qaz kəməri layihəsini dəstəklədiklərini söyləyib.

​