"Xəzərin siyasi statusunun razılaşdırılması sizin və kolleqalarınızın intensiv səyləri nəticəsində baş verdi".

Axar.az Ria-Novosti-yə istinadən xəbər verir ki, bu barədə İran Prezidenti Həsən Ruhani rusiyalı həmkarı Vladimir Putinlə görüşü zamanı deyib.

İkitərəfli münasibətlərin normal səviyyədə inkişaf etdiyini bildirən Ruhani Xəzər sammitinin səmərəli keçdiyini qeyd edib:

"Sammitdəki atmosfer çox yaxşı idi və bu onu göstərirdi ki, bütün ölkələr əməkdaşlığın inkişafına nail olub".

Rusiyanın Həştərxan şəhərində keçirilən Xəzər sammitində Xəzərin statusu ilə bağlı razılaşdırılan bəyanatda bildirilir:

"Xəzərdə tərəflərin fəaliyyəti onlar tərəfindən uyğunlaşdırılmış prinsiplər əsasında həyata keçiriləcək. Həmçinin ölkələrin müstəqilliyinə, ərazi bütövlüyünə hörmət ediləcək. Güc tətbiq edilməməli, qarşılıqlı hörmət, əməkdaşlıqlar, ölkələrin daxili işlərinə qarışmamaq başlıca meyar olacaq".

Həmçinin fövqəladə vəziyyətlərin aradan qaldırılması sahəsində bir sıra idarələrarası razılaşmalar imzalanıb, ekologiya və meteorologiya sahəsində əməkdaşlıq ediləcək.