"Xəzərin potensial konflikt zonası olması ilə bağlı fikirlər rus politoloqlarının uydurmasıdır".

Bu sözləri Axar.az-a politoloq Vəfa Quluzadə Xəzəryanı ölkə liderlərinin Həştərxan görüşünü şərh edərkən söyləyib. O, Rusiya politoloqlarının Həştərxan sammitinin nəticələrinin şişirtdiyini bildirib:

"Xəzər sammitində hər ölkə öz mövqeyində qaldı. Xəzəryanı dövlətlərin sammitində ölkələr heç bir tərəfin maraqlarına toxunmayan məsələləri müzakirə etdilər. Ümumi məsələlərdə hər bir ölkə öz sektorunda rəhbərdir. Orada hər kəs vurğuladı ki, məsələlər konsensusla həll olunur. Burada heç bir ölkənin marağına toxunmaq mümkün deyil. Sammitdə vurğulandı ki, Xəzər dənizi dostluq və sülh dənizidir. Ona görə də Xəzərin potensial konflikt zonası olması ilə bağlı fikirlər rus politoloqlarının uydurmasıdır. Mən düşünmürəm ki, Xəzərdə Azərbaycanla İran arasında hansısa mübahisəli məsələ qalır. Belə şey yoxdur. Əvvəllər Türkmənistanla aramızda Kəpəz neft yatağı ilə bağlı mübahisə vardı. Görünür, artıq bu da həll olunub. Ona görə də nə Bakı, nə də ki Aşqabad bu məsələlərdə bir-birinə heç bir irad tutmur".