Oktyabrın 13-də, saat 16:00-da "Four Seasons Hotel Baku" mehmanxanasının "Bayatı Şiraz" zalında Azərbaycan Respublikasının Avropa Şurasının Nazirlər Komitəsinə sədrliyi çərçivəsində "Avropa İrs Günləri"nin qeyd edilməsinə həsr olunmuş mətbuat konfransı keçiriləcək.

Axar.az xəbər verir ki, Azərbaycan Respublikasının Mədəniyyət və Turizm Nazirliyinin və Avropa Şurasının Demokratik İdarəçilik Direktorluğunun nümayəndələrinin iştirakı ilə baş tutacaq konfransda, layihənin və yeni yaradılmış "Avropa İrs Günləri Portalı"nın təqdimatı həyata keçiriləcək.

Tədbirdə eyni zamanda ötən illərdə Azərbaycanda "Avropa İrs Günləri"nin qeyd olunmasına həsr olunmuş qısa filmin də nümayişi nəzərdə tutulub.

Xatırladaq ki, tədbir üçün kütləvi informasiya vasitələrinin nümayəndələrinin qeydiyyatı 13 oktyabr 2014-cü il tarixində saat 15.30-dan etibarən həyata keçiriləcək.

Qeyd edək ki, "Avropa irs günləri" (EHDs), Avropa vətəndaşları arasında əməkdaşlıq çərçivəsində kütləvi qeyd olunan mədəni təşəbbüslərdən biridir. 1985-ci ildə Avropa Şurası tərəfindən irəli sürülmüş bu təşəbbüsə 1999-cu ildə Avropa İttifaqı Komissiyası da qoşulub. Hər 2 qurum indiyədək bu proqramı birgə davam etdirirlər. Hər il sözügedən layihə 50 Avropa ölkəsində keçirilir və müəyyən olunmuş günlərdə ziyarətçilər üçün minlərlə abidələrə və tarixi yerlərə ödənişsiz giriş təmin edilir. Bu təcrübə ilə Avropa vətəndaşları yalnız mədəni irsin zənginliyindən zövq almır, eyni zamanda, indiki və gələcək nəsil üçün onların qorunmasına və vəziyyətinin yaxşılaşdırılması işlərinə fəal şəkildə cəlb olunur. Hər il təxminən 20 milyona yaxın insan bu təşəbbüsdən yararlanır.