Bu gün mədəniyyət və turizm naziri Əbülfəs Qarayev
ölkəmizdə səfərdə olan İran İslam Respublikasının Radio və
Televiziya Təşkilatının sədri İzzətullah Zərqaminin başçılıq etdiyi
nümayəndə heyətini qəbul edib.
Bu barədə Mədəniyyət və Turizm Nazirliyindən Axar.az-a məlumat
verilib.
Nazir qonaqları salamlayaraq bildirib ki, iki ölkə arasında
münasibətlər müsbət istiqamətdə inkişaf edir: "Əminəm ki,
münasibətlərimiz bundan sonra bu dinamika ilə davam edəcək. Hər iki
ölkənin maraqlarını təmin edən məsələlər birlikdə müzakirə
ediləcək".
Səmimi qəbula görə minnətdarlığını ifadə edən İ.Zərqami bu
səfərin İran İslam Respublikasının Radio və Televiziya Təşkilatı
ilə Azərbaycan Mədəniyyət və Turizm Nazirliyi arasında əməkdaşlığın
qurulmasına zəmin olacağını deyib. O, rəhbərlik etdiyi təşkilatın
fəaliyyəti haqqında məlumat verərək bildirib ki, hər il
televiziyada uşaqlar üçün ümumi xronometrajı 20 min dəqiqə olan
animasiya filmləri və 400-ə yaxın bədii film istehsal edilir.
Mədəniyyət və incəsənətin digər sahələrində görülən işlər haqqında
fikirlərini bölüşən qonaq bu istiqamətdə əməkdaşlığın iki dost ölkə
arasında münasibətlərin daha da möhkəmlənməsinə xidmət etdiyini
vurğulayıb.
İ.Zərqami İranda Azərbaycan dillində fəaliyyət göstərən
televiziyalar haqqında da məlumat verərək qeyd edib ki, incəsənət
sahəsində verilişlər qəlbləri bir-birinə yaxınlaşdırır. İki
dövlətin mədəniyyət sahəsində əməkdaşlığı xalqlarımızın mənafeyinə
uyğundur.
Ə.Qarayev iki ölkənin mədəniyyətinin oxşarlığının tarixi kökləri
olduğunu diqqətə çatdıraraq bildirib ki, hər bir dövrün özü ilə
gətirdiyi müsbət hallar olur və hər dövrün xalqların
mədəniyyətinin, incəsənətinin inkişafında öz rolu var.
Görüş zamanı mədəniyyətin bir sıra sahələri üzrə əməkdaşlıq
barədə fikir mübadiləsi aparılıb.