Qarabağdakı separatçı rejimdə hərbi təlimlərin keçirilməsi bütün hallarda cəbhə xətti boyunca vəziyyəti gərginləşdirir.

Bu sözləri Axar.az-a politoloq Hatəm Cabbarlı deyib. O bildirib ki, Ermənistanda növbədənkənar parlament seçkilərinin keçiriləcəyi ərəfədə qondarma rejimdə 6 noyabrda hərbi təlimlərə başlanılıb:

“Ayın 10-na qədər davam edəcək hərbi təlimlərdə silahlı qüvvələrin qarşılıqlı fəaliyyətinin koordinasiyası və digər hərbi parametrlər yer alır. Əlbəttə, bu hərbi təlim və bundan əvvəlki hərbi təlimlər hər zaman gərginliyə səbəb olur. Qondarma rejimin hərbi helikopterinin də hərbi təlimlər zamanı Azərbaycan Ordusu tərəfindən vurulduğunu xatırlasaq, bu cür təlimlər zamanı əsəblərin tarıma çəkildiyini müşahidə etmək mümkündür. Azərbaycan Prezidenti cənab İlham Əliyev və Ermənistanın baş nazir əvəzi Nikol Paşinyan arasında Düşənbədə baş tutan ayaqüstü söhbətdə cəbhə xəttində gərginliyin azaldılması və atəşkəs rejiminə əməl edilməsi məsələləri müzakirə edilmişdi. Amma Ermənistan mütəmadi olaraq atəşkəs rejimini pozur və gərginliyi artırır”.

Politoloq vurğulayıb ki, Azərbaycan Ordusu işğal altında olan bölgədə qondarma rejimin keçirdiyi hərbi təlimləri diqqətlə izləyir və qarşı tərəfin manevralarını tədqiq edir: “Hər hansı arzuolunmaz bir hərəkət zamanı Azərbaycan Ordusu düşmənə layiqli cavab verməyə hazırdır”.

Qeyd edək ki, 6 noyabrda Dağlıq Qarabağdakı erməni hərbi birləşmələri hərbi-taktiki təlimlərə başlayıb.