Millət vəkili Siyavuş Novruzov Naxçıvan Muxtar
Respublikasının 90 illiyi münasibətilə müəyyən addımlar atılmasının
zəruruliyini bildirib.
Trend-in məlumatına görə,
S.Novruzov Milli Məclisin bu gün keçirilən plenar iclasında deyib:
"Bildiyiniz kimi, Prezident İlham Əliyevin sərəncamı ilə bu il
Naxçıvan Muxtar Respublikasının 90 illiyi geniş şəkildə qeyd
olunur. Bu il həm də müstəqillik tariximizin ildönümünün qeyd
edildiyini nəzərə alaraq, addımlar atılmalıdır. Tarixə nəzər salsaq
görərik ki, müstəqilliyə gedən yolun əsası Naxçıvan MR-dən
başlayıb. Ümummilli lider Heydər Əliyev orada Ali Məclisin sədri
olan dövrdə ilk dəfə Sovet Sosialist Respublikası sözü həmin
şəhərin ali məclisindən çıxarılıb. Eyni zamanda, Azərbaycanın
üçrəngli bayrağı məhz Naxçıvanda qaldırılıb. Həmrəylik Günü də məhz
orada elan edilib və Milli Məclisdə də bu məsələyə baxılaraq qəbul
edilib".
Millət vəkili xatırladıb ki, Leninqrada (hazırkı
Sankt-Peterburq) o vaxt 4 illik blokadasına görə qəhrəman şəhər
statusu verildi: "Hesab edirəm ki, Leninqrad 4 il blokadada qalaraq
bu statusu alıbsa, Naxçıvan 24 ildir blokadada yaşayır. Bu
baxımdan, bu il Naxçıvanın 90 illiyi, həm də müstəqilliyimizin
ildönümünü nəzərə alaraq, parlamentdə məsləhətləşmələr aparıb
Naxçıvan haqqında hər hansı bir qərar qəbul etməyinizi təklif
edirəm. Bu da Naxçıvanın daha da güclənməsinə bir töhfə olar".