Suraxanı rayonundakı Qaraçuxur parkı məmurlar arasında mübahisəyə səbəb olub.

Axar.az-ın əldə etdiyi məlumatlara görə, parkın abadlaşdırılması üçün Suraxanı Rayon İcra Hakimiyyəti (RİH) tender elan edib. Tenderdə "Azinpot" MMC qalib gəlib və parkın yenidən qurulması üçün vəsait ayrılmasını gözləyib.

Amma Suraxanı RİH parkın təmir-tikintisinə zəruri olan vəsaiti MMC-nin balansına köçürməyib: "Park Mədəniyyət və Turizm Nazirliyinin yerli idarəsinin nəzdində vətəndaşların xidmətinə verilib. Məsələnin bu dərəcədə yubanmasını görən nazirliyin yerli idarə nümayəndəsi icra hakimiyyətinə gedib", - deyə xəbərdə bildirilir.

İddiaya görə, idarə məmuru icra başçısı İlqar Abbasovla görüşüb və parkla bağlı yaranmış problemi müzakirə edib. Həmin məmurun icra başçısından "Azinpot" üçün pul istəməsi ikincinin xoşuna gəlməyib və tərəflər arasında mübahisə yaranıb.

Mənbənin qeydinə görə, hazırda məsələ daha yuxarı instansiyaların diqqətindədir.

Suraxanı İcra Hakimiyyətinin İctimai-siyasi və humanitar məsələlər şöbəsindən Axar.az-a məsələ ilə bağlı açıqlama verə bilməyəcəklərini qeyd etdilər. Əlavə etdilər ki, medianın sualına yalnız icra hakimiyyətinin mətbuat xidməti cavab verə bilər, mətbuat katibi Barxudar Barxudarov isə məzuniyyətdədir.