"Abxaziyanın Gömrük İttifaqına daxil edilməsindən dərhal sonra böyük ehtimalla Cənubi Osetiyanı da bu tale gözləyir".

Bu sözləri Axar.az-a açıqlamasında Türkiyədə yaşayan azərbaycanlı politoloq Orxan Qafarlı deyib.

O, Rusiyanın bu tip addımının Qafqazda həll olunmamış konfliktlər üçün təhlükə yaradacağını deyib:

"Rusiyanın Cənubi Qafqazda Abxaziya ilə bağlı belə bir qərar verməsi ümumilikdə həll olunmamış konfliktlərin gələcəyi üçün təhlükəli görünməkdədir. Abxaziyanın Gömrük İttifaqına daxil edilməsindən dərhal sonra böyük ehtimalla Cənubi Osetiyanı da bu tale gözləyir. Regionda bu tip yanaşmanın Dağlıq Qarabağa da şamil edilməsi riski mümkündür. Əgər Azərbaycan Gürcüstanın xarici siyasət yolunu davam etdirsə, bu plan reallaşacaq. Əlbəttə, Azərbaycan xarici siyasətində bundan sonrakı dönəmdə daha ehtiyatlı olmalıdır".

Qeyd edək ki, Rusiya Abxaziya ilə birgə ortaq müdafiə birlikləri və ticarət əhatəsinin yaradılması haqqında qərar verib. Bu addım Gürcüstan tərəfindən qətiyyətlə pislənib. Rəsmi Tiflis tezliklə bunun qarşılığını verəcəyini bildirib.