İrandan Azərbaycana idxal olunan kartof məhsullarının həcmi azalıb.

Axar.az-a bu haqda bir qrup tacir xəbər verib. Onların sözlərinə görə, İran kartofunun idxalında məhdudiyyət bazarda yerli məhsula şərait yaratsa da, bu, bahalaşmaya səbəb ola bilər. Tacirlər yerli kartof məhsullarının onsuz da baha qiymətdə olmasını qeyd edərək, bundan sonra qiymətlərin daha da qalxacağını istisna etmirlər.

İran kartofunun idxalında yaranmış problem qonşu ölkənin daxili tələbatı ilə əlaqələndirilir. Qeyd olunur ki, daxili bazarda ərzaq qıtlığı yarandığı üçün İran kartof ixracına məhdudiyyət qoyub. Tacirlər bu halın yaxşı perpektiv vəd etmədiyini söyləyirlər.

Hazırda bazarda yerli Gədəbəy kartofu təxminən 1 manat 20 qəpikdir və onun 30 qəpik bahalaşacağı gözlənilir. Eyni zamanda, Pakistandan gətirilən kartof məhsullarına tələbatın az olması və əsasən, Cəlilabad, Gədəbəy kartofunun bazarda alıcılıq qabiliyyətinin yüksəkliyi qiymətlərə kəskin şəkildə təsirini göstərəcək.