"Simferopol-İrəvan təyyarə reysinin açılması beynəlxalq normalara ziddir".

Axar.az xəbər verir ki, bu açıqlama ilə millət vəkili Fuad Muradov çıxış edib.

O, İrəvanın separatçı rejimlərə dəstək verməsinin Ermənistanın ənənəvi dövlət siyasətinə uyğun olduğunu bildirib:

"Krımın "Nəqliyyat naziri" Simferopol-İrəvan reysinin açılmasını təsdiq edib. Ermənistandan Krıma təyyarə reysinin açılması bütün beynəlxalq normaların pozulmasıdır. İrəvanın buna məhəl qoymaması bir daha Ermənistanın yürütdüyü siyasətin mahiyyətini açır və işğalçı dövlət olduğunu göstərir. Ermənistan bundan əvvəl Azərbaycanın işğal olunmuş ərazisi olan Xankəndində hava limanı açmağa cəhd etmişdi. Bu növbəti fakt bir daha göstərir ki, İrəvanın separatçı rejimlərə dəstək verməsi onun ənənəvi dövlət siyasətidir. Bu isə Qərbin separatçı rejimləri dəstəkləyən ölkələrə qarşı elan etdiyi sanksiyalarının Ermənistana da tətbiq olunmasını zəruri edir. Qeyd edim ki, Ukraynanın ərazisi olan Krıma istənilən reys qanunsuz hesab olunur. Ukrayna 2014-cü ilin mart ayından "Simferopol" hava limanının bağlandığını rəsmən bəyan edib".